Ихэнх төрлийн цайнд хар тугалга агуулагддаг тул жирэмсэн болон хөхүүл эмэгтэйчүүдэд хортой нөлөө үзүүлэх магадлалтай гэж Канадын Алберта их сургуулийн судалгаагаар тодорхойлжээ.
Өчүүхэн хэмжээний хар тугалга ч хүүхдийн өсөлтөд аюултай аж. Цайн дундаа Хятадад үйлдвэрлэсэн цай илүү аюултай байна. Учир нь цай ургах явцдаа ч үйлдвэрийн хорт бодисыг өөртөө шингээж байдаг. Хятадад үйлдвэрлэсэн, органик цайг 15 минут буцалгахад хар тугалга нэн ихээр ялгарчээ. Харин Энэтхэг, Шри-Ланкад үйлдвэрлэсэн цайг уухад гэмгүй гэнэ.

Судалгаанд нэртэй 30 брэндийн цайг хамруулан, гурван минут буцалгахад 73 хувь, 15 минут буцалгахад 83 хувь нь таван микрограмаас дээш хэмжээний хар тугалгыг ялгаруулсан байна. Энэ нь байх ёстой хэмжээнээс давсан үзүүлэлт биш хэдий ч эмэгтэйчүүд өдөрт гурваас дөрвөн аяга уувал аюул учруулах хэмжээ юм.
Хар тугалга хүний биед хуримтлагдсанаар IQ үзүүлэлт буурч, оюун ухаан балартах, үхэлд хүргэх аюултай аж.