Оросын төмөр зам төрийн өмчит компанийн тэргүүн Владимир Якунин Олон улсын Олимпын хорооны гишүүн Жан Франко Касперийг шүүхэд өгөхийг шаарджээ. Якунин “Швейцарийн албан ёсны төлөөлөгч хүн Олимпын бүтээн байгуулалтад гаргасан мөнгөний гуравны нэгийг нь хулгайлсан гэж мэдэгдэж байгааг юу гэж ойлгох вэ? Хэрэв хулгайлсан гэдгийг нотлох ямар нэг баримт олсон бол шууд гаргаад ир л дээ. Үгүй юм бол бусдыг гүтгэсэн болох бөгөөд ийм хүнийг хуулиар шийтгэх хэрэгтэй” гэжээ.
Олон улсын Олимпын хорооны гишүүн, Олон улсын цанын спортын холбооны Ерөнхийлөгч Швейцарийн Жан Франко Каспер нутгийнхаа нэгэн теле сувагт ярилцлага өгч байх үеэрээ Олимпын барилгын ажилд буй авлигын төвшний талаар асуухад нийт Оросын хэмжээнд дэд бүтцийн объектуудыг барихдаа гуравны нэг хүртэлх мөнгийг нь хулгайлдаг гэж сонссон гэсэн юм. Гэхдээ үүнийг гэрчлэх ямар ч баримт үзүүлээгүй.