АНУ-ын Цэргийн нисэх хүчинд сүүлийн хэдэн жил гарч байгаагүй дуулиант хэрэг гарчээ. Цэргийн нисэх хүчний сайд Дебора Ли Жеймийн хийсэн мэдэгдлээс үзвэл зургаан нисэх баазад алба хааж байсан 11 офицер хар тамхи тогтмол хэрэглэдэг байсныг илрүүлжээ. Эдгээрээс гурван офицер нь цөмийн цэнэгт хошуу бүхий “Минитмен” пуужин байрлуулсан Вайомин, Монтана муж дахь цэргийн баазад байлдааны жижүүрт тогтмол гардаг байсан нь хамгийн их дуулиан тарьсан юм. Дэлхийг хэдхэн минутад устгах хүчтэй асар хүчирхэг цөмийн пуужинг хөөргөх эрхтэй офицер хүн үүрэгт ажил дээрээ хар тахи татаад мансуурлын байдалтай байх нь байж боломгүй зүйл болохор дуулиан тарихаас ч аргагүй. Үүний дээр цөмийн пуужингийн баазад алба хааж байсан 34 офицер нь ажлын чадвар, мэргэжлийн төвшин тогтоох шалгалтын үеэр удирдлагаа тогтмол мэхэлдэг байсан нь илэрчээ.
АНУ-ын Цөмийн хүчний цэргийн албан хаагчид сар болгон албан үүргээ гүйцэтгэх үед хийх ёстой үйлдлийн дарааллын талаарх асуултуудад хариулан мэргэжлийн чадвар хангаж чадах эсэхээ шалгуулдаг. Гэтэл шалгалтын үеэр офицерүүд мэдэхгүй нэгэндээ зөв хариултыг мессэжээр явуулдаг байсан нь илэрчээ. Үүнээс болж 600 гаруй офицерыг дахин шалгалтад оруулахаар болсон байна. Зөрчил гаргасан офицеруудыг үүрэг ажлаас нь түр чөлөөлөөд байгаа аж.
