Швейцарийн хөгжлийн агентлагийн санхүүжилтээр Хүний аюулгүй байдлын судалгааны төвөөс хэрэгжүүлж буй “Төрийн үйлчилгээг иргэдэд хүргэх нь” төслөөс дүүргийн ЗДТГ-тай хамтран төрийн үйлчилгээг дүүргийн алслагдмал хорооны иргэдэд ойртуулах зорилгоор дүүргийн 16 дугаар хороонд “Нэг цонхны үйлчилгээ”-ний төвийг нээж өнөөдөр ашиглалтанд орууллаа.

16 дугаар хороо нь 9600 орчим хүн амтай, дүүргийн төвөөс 10 гаруй километрийн зайд оршдог. Тус хорооны НЦҮ-гээр нийгмийн халамж, нийгмийн даатгал, газрын харилцаа, улсын бүртгэл зэрэг төрийн үйлчилгээг иргэд, аж ахуй нэгжүүд чирэгдэлгүйгээр нэг дороос авах боломжтой болж байгаа юм. Түүнээс гадна дүүргийн Нийгмийн даатгал, өмч, газрын албаны мэргэжилтнүүд хороон дээр 7 хоног тутам батлагдсан цагийн хуваариар ирж, хорооны иргэдэд үйлчилгээ үзүүлэх юм.

Тус НЦҮ-ний төвийг  байгуулахад төрийн үйлчилгээг үзүүлэхэд шаардлагатай тавилга, техник хэрэгсэлд төсөл хэрэгжүүлэгч байгууллагаас 18 сая төгрөг , дүүргийн ЗДТГ-аас байр танхимын засвар тохижилтонд 20 сая  төгрөгийн хөрөнгө оруулалт хийлээ. Энэ төв нь Засгийн газрын 153 дугаар тогтоолын дагуу шинээр 4 хороонд байгуулах НЦҮ-ний төвийн 2 дахь нь юм.