Хятадад өнгөрсөн наймдугаар сард дөнгөж төрсөн нялх хүүхдийг нь төрөх эмнэлгийн эмч нь хулгайлж, бусдад худалдсан хэрэг гарч, олныг цочирдуулсан билээ. Энэ хэргийн мөрөөр хууль хяналтын байгууллага шалгаж, Жан Шусиа хэмээх тэр эмч долоон хүүхдийг ингэж худалдсан нь илэрсэн юм. Шааньси мужийн Фупин хотын төрөх эмнэлэгт ажилладаг тэрээр дөнгөж төрсөн нярайг төрөлхийн гажиг согогтой эсвэл эмчлэгдэхээргүй хүнд өвчтэй гэх зэргээр эцэг эхэд нь худал хэлээд хүүхдийг нь авч хүний наймаа хийдэг гэмт хэрэгтнүүдэд худалддаг байж. Гэхдээ азаар түүний худалдсан долоон хүүхдийн зургааг нь эцэг эхэд нь эсэн мэнд буцаан олж өгсөн бол нэг охин харамсалтайгаар амиа алдсан байна. Тэрээр 2011 оны арваннэгдүгээр сараас 2013 оны долдугаар сар хүртэл энэ гэмт хэргээ хийж байсан бөгөөд түүний эцэг эхээс нь салгасан хүүхдүүд дунд ихрүүд хүртэл байсан гэнэ.
Жан Шусиад шүүхээс хоёр жил хүртэл түдгэлзүүлсэн цаазаар авах ял оноосон байна. Түдгэлзүүлсэн цаазаар авах ялыг нөхцөл байдлаас нь хамааран бүх насаар хорих ял болгон өөрчлөх тохиолдол ч байдаг аж.
