Сагсан бөмбөгийн од Деннис Родман Хойд Солонгосын удирдагч Ким Чен Унд зориулан төрсөн өдрийн дуу дуулж өгчээ. Тэрээр удирдагчийн төрсөн өдөрт зориулсан сагсан бөмбөгийн тэмцээний өмнө танхим дүүрэн цугларсан 14 мянган үзэгч болон мэдээж Ким Чен Ун, түүний гэргий, намын дарга нарын өмнө дууг дуулжээ. Д.Родман Хойд Солонгост дөрөв дэх удаагаа ирж байгаа нь энэ бөгөөд сагсан бөмбөгийн хорхойтон Ким Чен Уныг баярлуулахаар Америкаас сагсчдыг авчран тэмцээн зохион байгуулжээ. Хэдийгээр Ким Чен Ун төрсөн өдрөө ийнхүү олны өмнө тэмдэглэсэн боловч тэр хэдэн оны хэдэн сарын хэдэнд төрсөн бэ гэдгийг хэн ч тодорхой мэдэхгүй.
Д.Родманыг Хойд Солонгос зорихын өмнө хүний эрхийн байгууллагуудын зүгээс нэлээд шүүмжилсэн боловч сагсан бөмбөгч тэрээр өөрийгөө улс орон төлөөлсөн хүн биш учраас надад хамаагүй хэмээн мэдэгдсэн юм. 
