Гонконгт гардаг хятадын төрийн мэдлийн  Wen Wei Po сонин Умард Солонгоын удирдагч Ким Чен Ун өөрийн авга ах Чан Сон Тхэкийгээ таван хамтрагчийн нь хамт нүцгэлж байгаад өлсгөлөн, сүрэг нохойд амьдаар нь хаяж өгсөн гэсэн мэдээлэл нийтэлжээ. Хэвлэл тэр торонд, тав хоног юу ч өгөөгүй өлсгөлөн 120 орчим анч нохой байсан гэж онцолсон байна. Зарим эх сурвалжийн мэдээлснээр умардын өндөр албаны зуу гаруй албан тушаалтан, Ким Чен Ун өөрөө энэ явдлыг нэг цаг хэртэй харж “зугаацсан” байна.
Ийм аймшигт цааз үнэхээр болсон эсэхийг хараат бус эх сурвалжаас баталгаажуулах боломжгүй юм гэж барууны хэвлэлүүд бичиж байна. Зарим хэвлэл энэ материалыг Бээжингийн албан ёсны хэвлэл нийтэлсэн болохоор үнэн гэж байгаа юм. Лидсийн Их сургуулийн эрдэм шинжилгээний ахлах ажилтан, өнөөгийн Солонгосын асуудлаар мэргэшсэн Эйдан Фостер-Картер “Умард солонгосын харгис дэглэмийн тухайд хэлэх юм алга, гэхдээ энэ бол арай хэтэрнэ” гэж хэлснийг британийн “The Independent” хэвлэл иш татсан байна.
Үүний өмнө хэвлэлүүд Чан Сон Тхэкийг хэд хэдэн албан тушаалтантай хамт Солонгосын Улсыг аюулаас хамгаалах яамны барилга дотор арванхоёрдугаар сарын 12-нд агаараас эсэргүүцэх пулемётоор буудаж цаазалсан гэж мэдээлж байсан юм. Гэхдээ үүнийг бас хэн ч батлаагүй юм. Цаазаар авхуулсан хүмүүсийн дотор Хөдөлмөрийн намын хоёр гишүүн, Засгийн газрын хоёр ч сайд, цэргийн өндөр тушаалын хоёр хүн  байжээ.
Ким Чен Ун  өөрийн хамаатан, улс орныхоо хамгийн нөлөө бүхий хүнийг цаазаар авсан тухайгаа “Намыг бохирдлоос цэвэрлэж байгаа  хэрэг” гэж нэрлээд ингэснээр улс орны нэгдмэл бүрэн бүтэн байдал, Солонгосын хөдөлмөрийн намын эв нэгдлийг хангах том алхам хийлээ гэж шиэн жилийн баяр тохиолдуулан ард түмэндээ мэндчилгээ дэвшүүлэхдээ хэлсэн юм.