Японы хүн амын тоо 2013 онд 244 мянгаар буурсан тухай тус улсын эрүүл мэндийн яамнаас мэдэгдлээ. Өнгөрсөн онд тус улсад 1,031,000 хүүхэд мэндэлсэн бол  1,275,000 хүн хорвоог орхисон байна. Шинээр мэндлэгсдийн тоо өмнөх жилийнхээс 6000-аар буурсан үзүүлэлттэй байгаа бл нас барагсдын тоо 19 мянгаар нэмэгджээ.  Японы хүн ам сүүлийн жилүүдэд ийнхүү байнга буурах үзүүлэлттэй явж байгаа аж. Хэрэв энэ байдал цааш үргэлжилсээр байвал ирэх 50 жилд Япон улс одоогийн хүн амынхаа гуравны нэг хувийг алдах юм. Одоогоор тус улсын хүн амын тоо 126,393,679 байгаа нь өнгөрсөн оныхоос 0,2 хувиар буурсан үзүүлэлт ажээ.
Тус улсын хүн амын 25 хувь нь 65-аас дээш насныхан эзэлж байгаа бөгөөд 2060 онд гэхэд 40 хувь болох тооцоо байна.