Умард Солонгосын удирдагч Ким Чен Ун ард түмэндээ хандаж шинэ жилийн мэндчилгээ дэвшүүлэхдээ өөрийн авга ах Чан Сон Тхэкийг цаазалсан тухайгаа анх удаа тайлбарласан байна.
Тэр өөрийн хамаатан, улс орныхоо хамгийн нөлөө бүхий хүнийг цаазаар авсан тухайгаа “Намыг бохирдлоос цэвэрлэж байгаа  хэрэг” гэж нэрлэсэн байна. Тэр бас ингэснээр улс орны нэгдмэл бүрэн бүтэн байдал, Солонгосын хөдөлмөрийн намын эв нэгдлийг хангах том алхам гэжээ. Ким Чен Ун “Нам ийм шийдвэр гаргаснаараа өөрийн доторхи намын эсрэг, хувьсгалын эсэргүү бүлэглэл, элементүүдийн цэвэрлэж  намын дотоод эв нэгдлээ бэхжүүлж байгаа юм” гэсэн байна.
Ким Чен Уны телевизээр хэлсэн үгэнд бас дэлхийн дайн, цөмийн аюулын тухай мэдэгдэл байна. Тэр АНУ-ыг “бас л аюулгүй байдалд байж чадахгүй байгаа” гээд харин Өмнөд Солонгостой харилцаагаа гүнзгийрүүлэх хүсэлтэй байгаагаа илэрхийлсэн байна.
Харин өнгөрсөн арванхоёрдугаар сард Пеньян бүр эсрэгээрээ өмнөд хөршдөө урьдчилан анхааруулалгүйгээр цохилт өгөхөд бэлэн байна гэж мэдэгдэж байсан юм.
Умард Солонгосын нөлөө бүхий хүн, удирдагчийн авга, 67 настай  Чан Сон Тхэкийг өнгөрсөн арванхоёрдугаар сарын 12-ны өдөр Пеньян дахь Аюулгүй байдлын яамны барилгад өндөр албаны хэд хэдэн хүнтэй хамт буудан цаазалсан юм. Улсынхаа хоёр дахь хүн, өнөөгийн удирдагчийн гол  зөвлөх байсан түүнийг төрийн эргэлт хийхийг санаархаж зохион байгуулсан, авлига авсан, мөрийтэй тоглосон, ард түмний хөрөнгийг хар тамхи хүүхэнд зарцуулж ёс бус амьдарсан хэмээн шийтгэсэн юм.