Сирид өдөр бүр шахам болж буй зөрчил мөргөлдөөний хүнд гэмгүй олон арван хүн амь үрэгдэж байгаагийн гэрч болж 17 настай гэрэл зурагчин хүү нас баржээ. Молхем Бракат хэмээх энэ хүү өнгөрсөн тавдугаар сараас хойш Ройтерсоос эхлээд дэлхийн томоохон хэвлэл мэдээллийн байгууллага, агентлагууд руу Сирийн дайны халуун цэгээс гэрэл зураг илгээж байсан юм. Сири дэх байдлыг хоёр талаас бие биеэ няцаасан байдлаар мэдээлж байгаа нөхцөлд газар дээрээс нь авсан ийм гэрэл зургууд юугаар ч үнэлэшгүй чухал юм. Тиймээс дайны хөлд 17-хон насандаа амь үрэгдсэн Молхем Бракатын хийсэн үйл хэрэг хэр баргийн хүний зориглож хийж чадахгүй зүйл юм. Тэрээр буун дуунаас айлгүй зөрчил мөргөлдөөний үйл явцаас дэлхий нийтэд мэдээлж байсныг өнөөдөр олон мянган үзэгч, уншигчид дурсч байна.