Нийслэлийн замын сангийн эх үүсвэрийг нэмэх зорилгоор ирэх оны эхнээс нийслэлд бүртгэлтэй тээврийн хэрэгслээс 10000-70000 төгрөгийн төлбөр авч эхэлнэ.

НИТХ-аас баталсан “Нийслэлийн авто зам, замын байгууламжаар зорчиж байгаа тээврийн хэрэгслээс авто зам ашигласны төлбөр авах журам”-ыг баталсан. Нийслэлд бүртгэлтэй тээврийн хэрэгслээс авах төлбөрийг жилд нэг удаа, авто техникийн улсын үзлэгтэй хамтатган авах аж. Суудлын автомашинаас хөдөлгүүрийн багтаамжнаас шалтгаалан 20-40 мянган төгрөг, такси 30 мянга, ачааны автомашины даацаас шалтгаалан 40-70 мянга, автобус насжилтаас шалтгаалан 40-60, мотоцикль, мопетноос 10 мянган төгрөгийн хураамж авах юм байна. Харин Шалган бүртгэх товчоогоор нэвтрэх орон нутгийн тээврийн хэрэгслийн төрлөөс шалтгаалан 1000-5000 төгрөгийн хураамж авах аж.