Харвардын их сургуулийн дөрвөн ч байранд тэсрэх бөмбөг тавьсан гэх худал цуурхал тарааж, оюутнуудыг дүрвэхэд хүргэсэн буруутай этгээдийг олж тогтоожээ. “Их сургуулийн барилгуудад бөмбөг байрлуулсан ” гэсэн хуурамч цахилгаан шууданг Элдо Ким гэгч 20 настай залуу тараасан байна. Энэ мэдээллийн улмаас оюутнуудыг дотуур байрнаас нь гаргаж, хичээлийн хоёр барилга, шинжлэх ухааны төвд байсан хүмүүсийг яаралтай гаргаж, хэдэн цаг мөрдлөг шалгалт хийсний эцэст худлаа болохыг нь тогтоосон юм. Өнгөрсөн сард Коннектикут дахь Йелийн их сургуульд галт зэвсэгтэй этгээд нэвтэрсэн гэдэг мэдээлэл тарж, мөн л зургаан цаг шахам хөл хорио тогтоож шалгасны дараа хуурамч дуудлага болохыг илрүүлсэн билээ. Оны эхээр Массачусеттсиын технологийн институтын кампуст ч мөн буутай хүн орж ирсэн гэдэг худал мэдээлэл олныг цочирдуулсан нь худлаа болж таарсан юм.
