УИХ-ын гишүүдийг ажилдаа ирэхгүй ирц хангалтгүй хэмээн хуралдаан болохгүй байна гэсэн шүүмжлэл гараад удсан. Сүүлийн хэдэн жил нэгэндээ картаа дамжуулж бүртгүүлэх, өөр хүний өмнөөс санал өгөх асуудалд анхаарал хандуулах талаар хөндөж байгаа ч дорвитой ажил хийгээгүй. Энэ удаагийн парламент ийм шүүмжлэлийг таслаж чадахгүй, гишүүд нь ч хуралдаа ирэхгүй хурал хойшлох нь ойрын өдрүүдэд бараг хэвийн үзэгдэл болсон. Тэгвэл өмнө нь хурууны хээгээр бүртгэл хийлгэдэг байх санал цөөнгүй гишүүд гаргасан нь тун удахгүй ажил хэрэг болж, хэрэгжиж эхлэх нь. УИХ-ын дарга З.Энхболд өчигдрийн нэгдсэн чуулганы хуралдааны үеэр “Энэ долоо хоногийн бямба, ням гарагт хурууны хээгээр бүртгүүлэх шинэ аргыг туршиж үзнэ. Ингэснээр ирэх долоо хоногоос гишүүд миний дэргэдээс картаа авч ирцээ бүртгүүлээд, тэр дарааллаараа үг хэлж, асуулт асуудаг зарчимд шилжнэ. Ямар нэг хуульд өөрчлөлт оруулахгүйгээр энэ асуудлыг шийдэх боломжтой” гэлээ.
Олон жил хэл ам таталж байгаа уг асуудлыг ийнхүү шийдэж, гишүүд хариуцлагатай ажиллаж боломжийг бүрдүүлэхээр болж байна.