Дэлхийн хамгийн баян, хамгийн тайван, хамгийн авлига багатай улсын нэг Сингапурт олныг хамарсан үймээн самуун дэгдэж, дэлхийн нийтийг гайхшрууллаа. Энэтхэг хороололд амьдардаг 33 настай залууг автобус мөргөсний дараагаар тус хорооллын оршин суугчид үймээн дэгдээж, хохирогчийг эмнэлэгт хүргэхээр ирсэн түргэн тусламж болон цагдаагийн таван машиныг шатаажээ. Хэргийн газар ирсэн цагдаа нар ганц ч буун дуу гаргалгүйгээр нэг цагийн дотор үймээнийг намжааж, 27 хүнийг баривчилжээ.
Сингапур нь яс үндэсний онцлогоор бөөгнөрөн амьдардаг гадны ажиллах хүчнээс ихээхэн хамааралтай. Тиймээс энэ улсыг донсолгосон үймээн самуун гол төлөв Хятад, Энэтхэг, Малайз хороолол гэх мэт газарт оршин суудаг хүмүүс үүсгэдэг гэнэ. Хамгийн сүүлд 40 жилийн өмнө Хятад ба Малайзаас гаралтай ажилчид үймээн дэгдээж, Сингапурыг тун ч таагүй байдалд оруулж байсан аж.
Сингапурын хуулиар олон нийтийг өдөөн турхирсан гэмт хэрэг үйлдсэн хүнд долоон жилийн хорих ял оноодог.