Өмнөд Африкийн Ерөнхийлөгч асан, арьс өнгөөр ялгаварлах үзлийн эсрэг цогтой тэмцэгч Нельсон Мандела 95 насандаа хорвоогийн мөнх бусыг үзүүлээд байна. Өмнөд Африк даяар Н.Манделагийн дурсгалын хүндэтгэх ажиллагаа өнөөдрөөс эхлэн 12 хоногийн турш үргэлжлэх бөгөөд  түүнийг рэх долоо хоногийн бямба гаригт сүүлчийн замд нь үдэх юм байна. АНУ-ын Ерөнхийлөгч Б.Обамагийн хэлсэнчлэн Н.Мандела зөвхөн энэ цаг үеийнхээ бус хүн төрөлхтөний бүхий л цаг үе дэх түүхэн гавьяатай нэгэн учир түүнтэй салах ёс гүйцэтгэхээр дэлхийн төр нийгмийн зүтгэлтэн, урлаг соёлын алдартнууд хэдэн арваараа ирэх бололтой. АНУ-ын Ерөнхийлөгч Б.Обама болон одоо амьд байгаа АНУ-ын экс төрийн тэргүүнүүд бүгд оршуулгын ёслолд оролцох сураг гарсны дээр телевизийн нэрт хөтлөгч Опра Уинфри, рок од Боно нар Өмнөд Африкт ирж, Н.Манделаг сүүлчийн замд нь үдэхээ мэдэгджээ. Өнөө цаг үед амьдарч байсан дэлхийн түүхэн хүмүүсийн нэг Н.Мандела таалал төгссөнд эмгэнэл илэрхийлж дэлхийн удирдагчид эмгэнэл илэрхийлсээр байна. НҮБ-ын Ерөнхий нарийн бичгийн дарга Бан Ги Мун, АНУ-ын Ерөнхийлөгч Б.Обамагаас эхлээд хэдэн мянган эмгэнэлийн зурвас цахилгааныг Өмнөд Африк руу илгээж байгаа юм.
Өмнөд Африкийн ард иргэдэд хайртай удирдагчтайгаа салах ёс гүйцэтгэх боломж олгохын тулд 2010 оны хөлбөмбөгийн ДАШТ болж байсан цэнгэлдэх хүрээлэнд шарилыг хэсэг хугацаанд байрлуулахаар төлөвлөсөн байна.
Бүх ёслол хүндэтгэлийн дараа түүний сүүлчийн хүсэлтийн дагуу шарилыг нь төрсөн нутагт нь аваачиж хөдөөлүүлэх ажээ.