Японы цөмийн цахилгаан станц “Фүкүшима-1”-д дахин осол гарсан тухай тус цахилгаан станцыг ажиллуулдаг “TEPCO” компани мэдэгджээ. Цөмийн цахилгаан станцт хуримтлагдаад байгаа цацраг идэвхээр бохирлогдсон усыг цэвэрлэх “ALPS” системийг ажиллуулах үеээр их хэмжээний давсны хүчил хоолойгоос алдагдсан байна. Үүнээс болж бохирдсон усыг цэвэрлэх ажлыг түр хугацаагаар зогсооход хүрчээ. “Фүкүшима-1”-д хуримтлагдаад байгаа асар их хэмжээний цацраг идэвхээр бохирдсон усыг аюулгүй болгох амаргүй ажлыг “ALPS” систем амжилттай хэрэгжүүлнэ гэдэгт мэргэжилтнүүд итгэж байгаа аж. Гэвч системд энэ мэтээр цөөнгүй удаа осол, гэмтэл гарч байв.
2011 онд Японд болсон хүчтэй газар хөдлөлтийн дараа үүссэн цунами цахилгаан станцыг дайрснаар 1986 онд Чернобыльд гарсан ослоос хойш хамгийн том цөмийн осол гарсан юм. Ослын үр дагаварыг арилгах явцад олон жижиг осол цөөнгүй гарч байсан. Тухайлбал, өнгөрсөн наймдугаар сард цацраг идэвхид бохирлогдсон 300 тонн ус далайд алдагдан, цөмийн станц орчмын цацраг идэвхийн төвшин зөвшөөрөгдөх хэмжээнээс 10 дахин хэтэрч байсан билээ.
