Белорусын ерөнхийлөгч Александр Лукашенко Москва-Брестийн их зам дээр1990-ээд онд хил дамжин явдаг машинуудыг дээрэмддэг байсан бүлэг дээрэмчдийг газар дээр нь буудан устга гэсэн тушаал өгч байсан гэнэ. Энэ тухайгаа тэрээр баасан гарагт оросын бүс нутгийн төлөөлөгчид оролцсон хэвлэлийн хурал дээр өөрөө хэлжээ. “Дээрэмчдийн хэд хэдэн бүлэглэл бий болж энэ замыг отон Брестээс оросын хил хүртэл замын жолооч нар, машин зөөвөрлөгчдийг тонодог байсан. Би эсэргүүцэл үзүүлэн бүгдийг газар дээр нь буудаж устга гэж хуулийнханд тушаасан. Гурван ч хэсгийг ингэж устгасан. Дөрөв дэх нь байгаагүй. Одоо хүртэл тайван л байна” гэж ерөнхийлөгч Лукашенко хэлжээ. Түүнийхээр бол тухайн үедээ газар аваад байсан энэ гэмт хэргийг таслан зогсооход үүнээс өөр арга байгаагүй гэнэ. “Харгис байсан ч байж мэдэх юм. Гэхдээ энэ аймшигт хэргийг хэрхэн дарах талаар өөр арга би олж хараагүй” гэж Белорусын тэргүүн хэлж байна. Ингэснээр Оросоос Европ руу, Белорус руу, тэндээс буцаж байгаа жолооч, зорчигчдын аюулгүй байдлыг хангахад энэ арга үр дүнгээ өгсөн гэж тэр бас хэлсэн байна.