2011 онд “Фүкүшима” цөмийн цахилгаан станц дээр осол гарсны дараанаас анх удаа энэ бүс нутагт тариалсан цагаан будааг эзэн хааны ордны хэрэгцээнд нийлүүлсэн байна. Японы эзэн хааны хэрэг эрхлэх газрын даргын мэдэгдэж байгаагаар Фүкүшимад тариалсан цагаан будааг авах хүсэлтийг эзэн хаан Акихито өөрөө гаргасан ажээ. Ингэснээр осол гарсан цөмийн цахилгаан станцаас 20 км-ийн зайтай байдаг Хирана хотын орчим тариалсан 120 кг цагаан будаа авсан юм байна. Хирана хот орчим үйл ажиллагаа явуулдаг фермерүүд 2011 оны газар хөдлөлт, цөмийн цахилгаан станцын ослын дараанаас асар их хохирол амссан бөгөөд үйл ажиллагаа явуулж чадахгүй байгаад энэ жилээс л цагаан будаа тариалж байгаа нь энэ аж.
Өнгөрсөн аравдугаар сард Хирана хотын орчмоос хураасан хоёр тонн цагаан будааг Японы Ерөнхий сайд Шинжо Абэ авч байсан юм. Цөмийн цахилгаан станцал осол гарсны улмаас Фүкүшима орчмын ус, хүнс, тариа ногоо цацраг идэвхийн нөлөөнд өртсөн тул хүний биед хортой байж болзошгүй гэж үзэн дийлэнх хүн хэрэглэхээс зайлсхийж байгаа юм.
Харин ийнхүү эзэн хаан, Ерөнхий сайд энэ нутгийн цагаан будааг хэрэглэж байгаа нь хүмүүсийн дунд байгаа айдсыг арилгах цаашдаа Фүкүшима орчмоос хураасан будаа, ургуулсан ногоо зэргийг хэвийн борлуулалттай болоход сайнаар нөлөөлнө гэж үзэж байгаа юм байна.
