Оросын түүхэнд банкын мөнгө хүргэгч машинаас хамгийн их мөнгө дээрэмдсэн хэрэг Санкт-Петербург хотод гарсан байна. Өдрийн 14 цагийн орчимд Мурманскийн зам дээр банкны мөнгө хүргэгч машин явж байхад машинтай дээрэмчид дайрч мөнөг хураагч, хамгаалалтын ажилтан суусан кабины хаалгыг түгжиж байгаад ачааны хэсгээс нь 150 сая рублийг хулгайлан авч одсон байна. Машины цонхны шил нь хуягласан, сум нэвтрэхгүй байснаас дотроос нь буудах ямар ч бололцогүй байснаас дээрэмчид нэг ч буун дуу гаргалгүйгээр мөнгийг дээрэмджээ. Дээрэмчдийн эрэн сурвалжилж байгаа ч ямар үр дүнд хүрсэн талаар мэдээлээгүй байна.
Үүнтэй бараг зэрэг шахам лхагва гаригийн өглөөгүүр Москвагийн Шереметьевийн нисэх буудалд автомат буугаар зэвсэглэсэн дээрэмчид Туркийн Стамбул хотоос ирсэн нэгэн зорчигчоос 2,7 сая доллар бүхий цүнхийг нь дээрэмдсэн хэрэг гарсан байна. Нисэх буудлын D терминалын дэргэд тэр хүний хамгаалагчид хүлээж байсан ч цэргийн хээрийн хувцастай дээрэмчид тэдэн рүү халдаж гавлаад мөнгийг авч ор сураггүй болсон байна.