Украины нийслэл Киев хотноо европын интеграцийн төлөөх талынхан эсэргүүцлийн том жагсаал хийж байна. Ням гарагт тус улсын хотуудад 17 том жагсаал болж Европын холбоонд элсэхээс татгалзсан ерөнхийлөгч Януковичийн шийдвэрийг эсэргүүцэж байгаагаа илэрхийлжээ.
Хамгийн том жагсаал хотын төв-Тусгаар тогтнолын талбайд болж албан бус мэдээгээр 100 орчим мянган хүн цугларсан байна. Цуглаан дээр Арсений Яценюк, ДЯЯ-ны сайд асан Юрий Луценко, Юлия Тимошенкогийн охин Евгения Тимошенко, боксчин Владимир Кличко нар үг хэлжээ.
Жагсагчид хугацаагүй эсэргүүцэл илэрхийлж байгаагаа зарласан байна. Дээд Радагийн ээлжит бус чуулган хуралдуулахаар  сөрөг хүчний депутатууд гарын үсэг цуглуулж эхэлснийг “Батькивщины” хөдөлгөөний тэргүүн, парламентын гишүүн Александр Турчинов энд мэдэгджээ. Түүнийхээр бол сөрөг хүчин амжилтад хүрвэл энэ чуулган арваннэгдүгээр сарын 27-нд болох юм байна.
Украины Засгийн газрын ордон руу нэвтрэх гэсэн жагсагчид руу цагдаагийн тусгай “Беркут” тасгийнхан нулимс асгаруулагч хий ашигласан ч Засгийн газрын байрны үүдэн дээр жагсагчид, цагдаагийнхан мөргөлдөхөд хүрчээ. Нулимс асгаруулагчаас гадна цагдаагийнхан мөргөлдөөний үеэр бороохой, хий ашиглаж хэд хэдэн удаа дэлбэлэгч шидсэн байна. Украины Засгийн газар  Европын холбоонд элсэх гарын үсэг зурах бэлтгэл ажлыг зогсоож, оронд нь Орос болон ЗХУ-ын бүрэлдхүүнд байсан бусад бүгд найрамдах улсуудтай харилцах харилцаагаа өргөжүүлнэ гэсэн шийдвэр гаргасны төлөө ийн эсэргүүцлийн хөдөлгөөн өрнөөд байгаа юм.