Чен Яныг харсан хүмүүс эгээтэй л Мао дарга амилаад ирэв үү гэлтэй сонирхдог. Гэвч тэдний Мао Зедунтэй эндүүрсэн өнөөх хүн нь бүр эмэгтэй хүн гэж байгаа. Өмнө нь дэлгүүрийн худалдагчаар ажиллаж байсан 51 настай Чен Ян саяхнаас ажил мэргэжлээ сольж, Хятадын хамгийн алдартай удирдагчдын нэг Маог дуурайх болсон байна. Тэрээр Маотой ялгахын аргагүй адилхан дүр төрхтэй болдог учраас нэгэн их дэлгүүр олны сонирхлыг татахын тулд түүнд хөлс төлж, гаднаа зогсоож, хүмүүст зургаа авахуулах боломж олгодог гэнэ. Энэ ажил нь Чен Янд өмнөх дэлгүүрийн худалдагчаас нь илүү өндөр орлого авчирсан ч гэр бүлийнх нь харилцааг бараг сүйтгэж орхижээ. Чен Яны нөхөрт эхнэр нь эрэгтэй хүний тэр тусмаа Мао даргын дүрийг дуурайх нь болсон нь огтхон ч таалагдахгүй байгаагаас сүүлийн үед тэдний харилцаа хүйтэрч хөндийрч, бараг салахдаа тулсан байна. Энэ тухай нөхөр нь телевизэд ярилцлага өгөхдөө "Мао даргатай унтана гэдэг та нарт ямар санагдах вэ" хэмээн ууртайгаар ярьсан гэнэ. Гэвч Чен Янд өндөр цалин хөлстэй ажил нь таалагдаж байгаа учир нөхрөөсөө эмээлгүй үргэлжлүүлэн хийсээр байгаа аж.