2022 онд Хөлбөмбөгийн дэлхийн аварга шалгаруулах тэмцээнийг зохион байгуулах эрх авсан Катарыг хүний эрхийг хамгаалах үйл ажиллагаа явуулдаг “Amnesty International” байгууллагаас буруутгасан мэдэгдэл гаргав. Катарын компаниуд тэмцээнд шаардлагатай объектүүдийг барихдаа цагаачдын хөдөлмөрийг шулж байна гэж “Amnesty International” зэмлэлээ. Цагаач ажилчдыг амь насанд аюултай нөхцөлд ажилладаг, эрүүл ахуйд нийцэхгүй орон байранд амьдардаг, авах ёстой цалингаа хэд сараар авч чаддаггүй гэдгийг тус байгууллага онцолсон байна. Улмаар өөрийн дотоодын хөдөлмөрийн хуулийг дагаж мөрдөхийг шаардлаа. Үүнээс өмнө НҮБ-ын төлөөлөгчид Катарын эсрэг үүнтэй адил утгатай мэдэгдэл хийж шүүмжилж байсан юм. Харин Катарын эрх баригчид тус улсад ажиллаж байгаа хөдөлмөрийн цагаачдын эрхийг бүрэн хамгаалж байгаа гэж мэдэгдсээр байна.