Испанийн Жирона хотын шүүх мэргэжлийн хөгжимчин нэгэн төгөлдөр хуурч эмэгтэйг долоон жил хагас хугацаагаар шоронд суух ялаар шийтгэж магадгүй байна. Хөрш нь төгөлдөр хуурчийг 2003-2007 онд долоо хоногийн таван өдөр, бүтэн найман цагаар хөгжимдөж нойрны дэглэм алдуулахын зэрэгцээ сэтгэцэд муугаар нөлөөлсөн гэж гомдол гаргасан юм байна. Тэгээд эцсийн эцэст байнгын дуу чимээнээс залхаж энэ байрнаасаа нүүхэд хүрсэн гэжээ.
Энэ заргын дагуу хөгжимчнийг буруутай гэж үзвэл хорихоос гадна түүнийг 10800 еврогоор торгож, дөрвөн жилийн хугацаанд ямар ч хөгжмийн зэмсгээр тоглох эрхийг нь хасах гэнэ.
Харин хөгжимчин Мартин үүнийг няцааж, хэзээ ч долоо хоногт 40 цагаар хөгжимдөж байгаагүй, өөр газруудад ажлаар явж байсан гэж мэдэгдсэн байна. Бүсгүйн гэрийнхэн ч дуу чимээг намсгах гэж байрандаа бололцоотой бүхнийг хийсэн, харин ч дуу чимээ бол нэгдүгээр давхарт байдаг супермаркетаас илүү их гардаг гэдгийг ч хэлсэн байна. Одоо төгөлдөр хуурч шударга ёс ялна гэдэгт итгэлтэй байгаа гэнэ.