Торонто хотын захирагч Роб Фордын паян ойрын хугацаанд лав дуусахгүй нь бололтой. Эхлээд архи уугаагаагүй, дараа нь хар тамхи хэрэглээгүй, одоо бол эмэгтэй ажилтнаа бэлгийн дарамтад оруулаагүй хэмээн ээлж дараалан хийсэн мэдэгдэл болгон нь баримтаар няцаагдаж байгаа захирагч хамгийн сүүлд өөрийгөө хамгаалахын тулд “гэртээ хангалттай секс хийдэг” гэж хүртэл олон нийтийн өмнө мэдэгдэж үзэв.
Одоогийн байдлаар архи, хар тамхи хэрэглэж, согтуу үеэд нэгэн эрэгтэйн аминд хүрнэ гэж заналхийлсэн нь дүрс бичлэг бүхий баримтаар нотлогдоод байгаа захирагч эхнэртэйгээ хамт телевизийн камерын өмнө зогсч, мэдэгдэл хийлээ. Энэ үеэр тэрээр өмнөх алдааныхаа төлөө уучлал хүссэн ч эмэгтэй ажилтнаа дотно харилцаанд орохыг шаардсан гэх яриаг үгүйсгэжээ. Тэрээр энэ мэдэгдлээ хийхийн өмнөхөн сэтгүүлчидтэй уулзах үеэрээ “Би гэрлэлтдээ сэтгэл хангалуун байдаг. Гэртээ хангалттай их секс хийдэг” гэсэн үг унагаж орхижээ. Мэдээж хотын захирагч хүн олны өмнө ийм зохисгүй зүйл ярьсан нь олон нийтийн дургүйцлийг маш ихээр хүргэж байгаагаас гадна хотын зөвлөлийн 44 гишүүний олонхийн саналаар суудлаасаа огцрох ёстой гэсэн шаардлага хүлээн аваад байна. Гэвч тэрээр огцрох бодолгүй, тэр бүү хэл ирэх сонгуульд нэр дэвшинэ гэж зүтгэсээр байгаа юм.
