Умард Солонгосын долоон ч хотод нийтдээ 80 орчим хүнийг цаазаллаа хэмээн өмнөд Солонгосын JoongAng Ilbo сонин мэдээлсэн байна. Тэднийг буруутгасан үндсэн шалтгаан нь тэр хүмүүс өмнөд Солонгосын телевизийн порно болон мөрийтэй тоглоом сурталчилсан зүй зохисгүй олон ангит кино, нэвтрүүлгийг үзсэн гэнэ. Хэвлэлийн мэдээлснээр бол хот бүрд 10 хүнийг  энэ сарын 3-ны ням гарагт олны нүдэн дээр буудан хороожээ. Цаазын нэг ажиллагааг бүр цэнгэлдэх хүрээлэнд явуулж, тэнд нь 10 мянган хүн, хүүхдүүд ч цуглаж үзсэн  гэнэ. Эрх баригичд цаазын ажиллагааг үзүүлэхээр хүмүүсийг зориуд цуглуулсан гэж хэвлэлд бичжээ.
Харин нийслэл Пеньянд хүмүүсийг цаазлаагүй гэж JoongAng Ilbo сонин мэдээлжээ. Энэ бол удирдагч Ким Чен Уныг төрийн эрхэнд гарснаас хойш болж байгаа хамгийн олон хүнийг цаазалсан явдал болж байна. Өнгөрсөн наймдугаар сарын сүүлчээр БНАСАУ-д эх оронч дуу дуулдаг хөгжмийн хоёр хамтлагийн гишүүдийг  чөлөөт сэдэвтэй зураг авхуулсан хэмээн цаазалсан юм. Зарим эх сурвалжийн мэдээлснээр тэр хүмүүсийн дотор эцэг  Ким Чен Ирийнхээ ятгалгаар хөндийрсөн Ким Чен Уны дурлалт бүсгүй дуучин хүүхэн байсан гэдэг юм.