Палестиний удирдагч агсан Яссир Арафат радио идэвхт полоний хэмээх бодист хордсон байх магадлалтайг түүний цогцост шинжилгээ хийсэн мэргэжилтнүүд мэдэгджээ.
2004 онд амьсгал хураасан Я.Арафатыг тархинд нь цус харваж нас барсан хэмээн эмнэлэгийн албан ёсны дүгнэлтэд бичсэн байдаг. Гэвч өдгөө есөн жилийн хойно ч маргаан дагуулсаар байдаг их удирдагчийн үхлийн шалтгааныг эцэслэн тогтоохоор Швейцарийн мэргэжилтнүүд лалын ёс заншлыг эвдэж байж шарилыг нь хөндөж, шинжилгээ хийсэн юм. Бараг жил шахам үргэлжилсэн шинжилгээний дүн гарахад шинжээчдийн төсөөлж байснаас хавьгүй өндөр хэмжээний химийн идэвхт бодис илэрсэн бөгөөд энэ нь түүнийг зориудаар хордуулж хөнөөсөн гэдэг таамаглалыг бараг батлахаар байна хэмээн урьдчилан үзэхэд хүргэжээ.
Палестинчуудын үздгээр бол Я.Арафатыг сөргөлдөгч Израилийн тал хордуулсан гэлцдэг ч үүнийг батлах баримт нотолгоо байхгүйн дээр израильчууд ч үгүйсгэсээр ирсэн юм. Швейцарийн шинжээчдийн дүгнэлтийг ч тэд “шинжлэх ухаан гэхээс илүү савангийн дуурь шиг юм” хэмээн шүүмжилсэн байна. Уг шинжээчдийн багийг Швейцариар овоглож байгаа ч Францы, Орос, Палестин гээд олон улсын мэргэжилтнүүд хамтран ажиллаж байгаа юм. Тэд талийгаачийн цогцос болон нас барахын өмнө Парист эмчлүүлж байсан эмнэлгийнх нь эд зүйлээс дээж аван шинжилжээ.
