Тээвэрлэж явсан машин нь эвдэрсний улмаас Нигерийн нутаг дахь  Сахарын цөлд харангадаж үхсэн 87 хүний цогцос олдсон байна. Тэдний олонхи нь хүүхэд эмэгтэйчүүд байжээ. Эднийг хойд Африк болон Европын орнууд руу явж байсан  хууль бус цагаачид гэж үзэж байна. Аврагчдыг олох үед тэдний цогцос аймшигтай болж, нэлээд хэсгийг нь цөөвөр чоно идсэн байжээ.
Нигерийн эрх баригчдын мэдээгээр бол цагаачид есдүгээр сарын сүүлчээр хоёр машинаар замд гарсан юм байна. Тэгээд нэг машин нь эвдрэхэд зорчигчид нь хэдэн хэсэг болж тал тал тийшээ яван суурин газар олж, сэлбэг авахаар явсан нь тэр байжээ. Тэдний нэг хэсэг нь Арлит хот хүрч чадсанаар цэргийнхэн, аврагчид  бусад хүмүүсийг хайж гараад олсон нь энэ гэнэ. Арлит хотын захирагч энэ явдлыг “миний амьдралд тохиосон хамгийн муу өдөр” гэж нэрлэсэн байна.
Өнгөрсөн есдүгээр сард африкийн 250 орчим дүрвэгчийн сууж явсан хөлөг Италийн Сицилийн эрэгт живж тэдний олонхи нь живж амь алдсан хэрэг бас гарч байсан юм.
Африк болон Ойрхи дорнодод улс  төрийн байдал тогтворгүй болж дотоодын үймээн, зэвсэгт мөргөлдөөн тасрахгүй байгаагаас болж жил бүр хэдэн арван мянган хүн Европ руу дүрвэж гардаг юм.