АНУ-ын Нью Мехико мужийн хөдөөгийн зарим хотод саарал чононоос хамгаалах зорилгоор хаалт бүхий автобусны зогсоолтой болжээ. Хэдийгээр энэ зогсоолд  тийм ч таатай санагдахааргүй боловч аюулгүй байдлын үүднээс оршин суугчдыг хамгаалах хамгийн зөв гарц бол энэ гэж хотын удирдлага үзэж байна. Гэхдээ  саарал чоно үнэхээр нутгийн оршин суугчдын амгалан тайван байдалд заналхийлж байна уу гэдэг эргэлзээтэй хэмээн байгаль орчны идэвхтнүүд энэ арга хэмжээг эсэргүүцэж байна. Учир нь, сүүлийн 40 жилийн хугацаанд саарал чоно хүн рүү халдсан тохиолдол ганц ч гараагүй, маш цөөн тохиолдолд мал амьтан руу халдсан байдаг нь гэрийн тэжээвэр нохойныхоос цөөн байгааг тэд онцолжээ. Ийм байхад саарал чононы талаар олон нийтэд буруу ойлголт төрүүлж, аюултай амьтан мэт сэтгэгдэл төрүүлж болохгүй хэмээн тэд эсэргүүцэж байгаа юм. Гэвч хотын оршин суугчид ийм автобусны зогсоолтой байх нь зөв гэж үзэж байна. Учир нь, энэ оны эхээр автобус хүлээж зогссон ээж хүү хоёрын ойролцоо чоно дөхөж ирсэн явдал гарчээ. Хэдийгээр чоно тэдэн рүү дайраагүй ч маш аюултай эрсдэлтэй нөхцөл байдал үүссэн хэмээн гэрчүүд ярьж байна.

Зураг дээрх Мексикийн саарал чононы тоо толгой сүүлийн жилүүдэд огцом цөөрч, устах аюулд хүрээд байгаа бөгөөд Нью-Мехико, Аризона мужид 75 л үлдсэн байна.