Киргиз улс дахь АНУ-ын ЭСЯ-нд сэжиг бүхий цагаан нунтагтай дугтуй ирлээ гэж дипломат албаны хэвлэлийн алба мэдээлжээ. Өчигдөр өглөө тус ЭСЯ-ныхан бүгд ажил дээрээ байхад нь тус захидал ирсэн байна. ЭСЯ-ныхан уг захидал ямар хаягтай, Киргизийнх үү, эсвэл олон улсын хаягтай байсан уу гэдгийг мэдээлээгүй байна. “Уг бодис химийн аюултай бодис эсэхийг тогтоохоор ажиллаж байна” гэж АНУ-ын ЭСЯ-ны төлөөлөгч мэдэгджээ.
Сүүлийн жилүүдэд цагаан нунтаг бүхий захидал илгээмж улстөрчдөд ирэх явдал хэд хэдэн удаа гараад байгаа юм. Энэ оны дөрөвдүгээр сард гэхэд л АНУ-ын Ерөнхийлөгч Барак Обама, сенатч Рожер Уиккер, Миссипи мужийн шүүгч Сэди Холланд нарт хаягласан ийм захидал ирж байлаа. Тавдугаар сард Нью-Йорк хотын дарга Майкл Блумбергт ийм захидал ирсэн дотор рицин гэдэг хор байсан юм.
