Өмнөд Солонгосын “Korea Aerospace Industries” компани Филиппинд 50 ширхэг “FA-50” хөнгөн сөнөөгч онгоц худалдах болсон нь манай урд хөршийн эрх баригчдын дургүйцлийг маш ихээр хүргэжээ. Улмаар Хятадын Гадаад хэргийн яамнаас Өмнөд Солонгосын талд зориулсан “зөвлөгөө” үйлдэн албан ёсоор явуулсан байна. Шалтгаан нь хоёр улсын хооронд өрнөсөн газар нутгийн маргаан. Өмнө нь Хятадын тэнгис дэх Хуанъянь арлуудаас болж Филиппин ба БНХАУ хэдхэн сарын өмнө байлдах дээрээ тулаад юм. Маргаантай арлуудын орчим Филиппинийн эргийн хамгаалалтын усан онгоц хятадын загас агнуурын хөлөг онгоцыг саатуулан нэгжих гэснээр маш түгшүүртэй байдал үүдсэн билээ.
“FA-50 ” сөнөөгч онгоцыг Өмнөд Солонгосын компани Америкийн “Lockheed Martin”-тай хамтран зохион бүтээжээ. Энэ сөнөөгч онгоц нь цагт 1485 км хүртэл хурдлах чадвартай бөгөөд 1850 км-ийн алсад цохилт өгөх чадвартай юм.
