Америкийн ТТГ-ын ажилтан Сноудений илчилсэн нууц мэдээлэлтэй холбоотой дуулиан тасрахгүй байна. Сноудений илчилснээр Америкийн Аюулгүй байдлын агентлаг нь Европын улс төрийн элитэд багтдаг хүмүүсийн утасны яриаг 10 гаруй жилийн турш нууцаар чагнадаг байжээ. Германы Канцлер Ангела Меркелийг гэхэд л парламентын сөрөг хүчин байсан “Христийн ардчилсан хүчин”-ийн тэргүүлэгч байсан цагаас, канцлер болохоос гурван жилийн өмнөөс эхлэн утасны яриаг нь нууцаар чагнадаг байсан аж.
Хамгийн хачирхалтай нь хоёр дахь удаагаа сонгогдсон Обама хүртэл ингэж нууцаар чагнадгийг нь мэддэггүй байсан болж таарсан юм. Тиймээс Герман, Францын Засгийн газрын тэргүүнүүд дургүйцлээ илэрхийлсний дараагаар Обама нууцаар чагнах хөтөлбөрийг хааснаа албан ёсоор мэдэгдсэн байна.
Америкийн түнш, хамтрагч гэсэн статустай улсын төрийн тэргүүнүүдийн утас, электрон шууданг нууцаар чагнаж байсныг Сноуден ил болгосны дараа олон орны төрийн тэргүүн эсэргүүцэл, дургүйцлээ илэрхийлсэн юм. Тухай бүрт Америкийн тусгай албаны хүмүүс АНУ-ыг алан хядах дайралтаас сэргийлэхийн тулд төрийн тэргүүнүүдийн утасны яриаг нууцаар чагнадаг гэсэн тайлбар өгч байсан юм.
