АНУ-ын тэргүүн хатагтай Мишель Обама эрүүл амьдралын хэв маягийг дэмждэг нэгэн. Тэрээр 2008 онд Цагаан ордны эзэгтэй болсон цагаасаа идэвхтэй хөдөлгөөн, эрүүл хооллолтыг уриалсан “Let’s Move” хэмээх кампани өрнүүлсэн бол энэ удаа америкчуудыг өдөр тутмын амьдралдаа илүү их ус ууж байхыг уриалан “Drink Up” хэмээх хөдөлгөөн эхлүүлээд байна. Хатагтай Обама өнгөрсөн сард Вашингтон Таймс сонинд ярилцлага өгөхдөө “Хэрэв бид өөрсдийгөө болоод гэр бүлээ эрүүл байлгах ядаж ганцхан алхам хий гэвэл ус ух нь хамгийн зөв” хэмээн ярьсан юм. “Өдөрт уух усныхаа хэмжээг нэг аягаар нэмэхэд л таны эрүүл мэнд, өдрийн эрч хүчинд чинь жинхэнэ өөрчлөлт гарахыг та мэдрэх болно” хэмээн тэргүүн хатагтай америкчуудад уриалж байна.

Хийжүүлсэн ундаа, түргэн хоол идэхээ багасгаж, дасгал хөдөлгөөнөө идэвхжүүлэн эрүүл амьдрахыг уриалдаг тэргүүн хатагтай өөрөө үлгэр жишээ үзүүлэхийн тулд өмнө нь Цагаан ордны цэцэрлэгт хэрэгцээнийхээ хүнсний ногоог тарьж байсан бол саяхан “Bigges Loser” хэмээх жин хаях телевизийн шоу нэвтрүүлэгт өөрийн биеэр оролцож, хэрхэн дасгал хийдгээ үзүүлжээ.