Бельгийн цагдаа нар Брюсселийн нисэх буудлаас Сомалийн далайн дээрэмчдийн хамгийн зартай толгойлогч гэгддэг Мухаммед Абди Хассан гэгчийг баривчилсан байна.
“Афвейн” хочтой Абди Хассаныг 2009 онд НҮБ-аас Сомалийн хамгийн нөлөө бүхий далайн дээрэмчин гэж зарлан олон улсын түвшинд эрэн сурвалжилж байсан билээ. “Афвейн”-ийн дээрэмчдийн бүлэглэл нь 2008-2013 онд Аденийн буланд олон улсын худалдааны усан онгоцыг барьцаалан хэдэн сая ам.долларын төлбөр авч хөлжсөн гэдгээрээ алдартай. Зөвхөн  2009 онд гэхэд л Бельгийн харьяаны “Помпей” усан онгоцыг барьцаалан хоёр сая еврогийн төлбөр авч байж суллан олон улсын анхаарлын хүрээнд орж байсан юм.
Бельгийн цагдаа нар түүнийг баривчлахын тулд олон сарын турш үргэлжилсэн тусгай ажиллагаа явуулсан байна. Далайн дээрэмчдийн ахлагчийг энэ оны нэгдүгээр сард дээрэм хийхээ больж, улс төрд хүчээ үзэхээр болсон тухай мэдэгдсэний дараагаар 21 дүгээр зууны далайн дээрэмчдийн амьдралыг харуулсан кинонд зөвлөхөөр ажиллахыг урьж Бельгид оруулж ирээд баривчилжээ.