Хэдэн жилийн өмнө "Karate Kid" хэмээх Холливудын кино үзэгчдийн талархлыг хүлээж, дорнын биеэ хамгаалах урлагийг барууныхан сонирхох болсон. Тэгвэл жинхэнэ "karate kid" гэмээр хүүхдүүд Балбад амьдарч байна. Катмандугийн дунд сургуулийн хоёр багш өдрийн 50-100 непал рупи буюу 50 центээс нэг ам.доллар хөлстэйгөөр хүүхдүүдэд ушугийн бие хамгаалах урлагийн хичээл заадаг аж. Хэдийгээр хоёр багш нь хичээлээ багахан хэмжээний үнэ төлбөртэйгөөр зааж байгаа ч тэдний дасгал сургуулилтын гол зорилго нь улсын болон олон улсын бие хамгаалах урлагийн тэмцээнд уралдаанд бэлтгэх зорилготой гэнэ. Хятадад үүсч бий болсон ушугийн тулааны урлагийн дэлхийн аварга шалгаруулах тэмцээн 1991 оноос зохиогдож эхэлсэн. Энэ тулааны урлагийн хамгийн том төлөөлөгч болох кино од Жет Ли Хятадын Ушугийн аварга шалгаруулах тэмцээнд 15 удаа түрүүлж, нэг удаа мөнгөн медаль хүртэж байсан юм.