Оросын Ерөнхийлөгч В.Путин, АНУ-ын төрийн тэргүүн Б.Обама нар Санкт-Петербургт болсон Их 20-ийн чуулганы үеэр нүүр тулсан ч Сирийн асуудлаар хоёр тийш харсан байр сууриа хадгалсан хэвээр буцлаа. Тэр ч бүү хэл В.Путиний зүгээс Сирид явуулж болзошгүй АНУ-ын цэргийн ажиллагааг хэзээ ч хүлээн зөвшөөрөхгүй гэдгээ дахин нотлов. Тэрээр “Биднийг Сирид туслах уу гэж үү. Тиймээ, бид туслана. Бид аль хэдийнэ туслаад эхэлсэн. Бид эдийн засгийн хамтын ажиллагаатайн хувьд зэвсэг техник ч илгээсэн” хэмээн  мэдэгдсэн нь хэрэв АНУ тус улс руу довтолвол ОХУ Сирийн ард зогсохоо хангалттай илэрхийлсэн хэрэг боллоо. Түүний мэдэгдэлтэй зэрэгцэн Оросоос Газрын дундад тэнгис рүү дөрөв дэх байлдааны усан онгоцоо илгээсэн гэдэг мэдээ цацагдлаа.