Хятадын Шааньси мужийн хөдөлмөрийн аюулгүй байдлын газрын түшмэл асан Ян Дацайд шүүхээс 14 жилийн ял оноолоо. Тэр бол 36 хүний аминд хүрсэн автобусны ослын газар ирээд байхдаа инээж буй зураг нь интернэтэд тарсны улмаас олон нийтийн дургүйцлийг төрүүлж, албан тушаалаасаа салсан нэгэн юм. Өнгөрсөн оны наймдугаар сард гарсан ослын газар ирээд байхдаа тэрээр яагаад ч юм жуумалзаж орхисон нь эцэстээ түүний бүх гэмт хэргийг уудлах эхлэл болжээ.
Ян Дацайгийн зургийг харж, дургүйцсэн хүмүүс түүний эсрэг интернэт кампани өрнүүлж, түүний маш үнэтэй цаг зүүсэн зургуудыг ээлж дараагаар илчлэн тавих болсон юм. Төрийн албан хаагч хүн жирийн цалингаар яавч тийм үнэтэй цагнууд худалдан авах боломжгүй хэмээн олон нийт шүүмжилж, энэ дагуу албаныхан түүнийг шалгаснаар авлига хээл хахуулийн хэргийг нь илрүүлжээ. Мужийн жирийн нэг төрийн албан хаагч тэрээр таван сая юанийн хөрөнгө хуримтлуулж амжсан байсан бөгөөд үүнийг ямар замаар, хэрхэн олсон тухайгаа тодорхой тайлбарлаж чадахгүй байж. Тийм ч учраас түүнийг эхлээд ажлаас нь халж, дараа нь намын гишүүнчлэлээс хасч, эцэст нь шүүхээс ял оноолоо. Түүний цагны цуглуулга дотор 35 мянган юань буюу 5500 ам.долларын үнэ бүхий цаг хүртэл байсан нь олон нийтийг сэжиглэхэд хүргэсэн байна.