БНАСАУ-ын удирдагч Ким Чен Уны эхнэр өөрийн гадаад төрхөөрөө олон нийтийг гайхшруулсан байна. Ли Соль Жу хатагтай нутгийн “Моранбон” хамтлагийн концерт үзэхээр ирэхдээ умард солонгост удаан хугацааны турш мөрдөгдсөн удирдагчийн эхнэр урт үстэй байдаг уламжлалыг эвдэн үсээ барууны хэв маягаар тачирхан халимаг болгон засуулсан байжээ. Тэргүүн хатагтай ингэж улс орондоо хориглоод байсан хэв маягаар үсээ засуулснаас гадна хувцасныхаа ч хэв загварыг огт өөрөөр сонгож захтай хөх цэнхэр цамч өмссөн нь нэгэн ижил дүрэмт хувцас өмсдөг солонгост ёстой л олныгг алмайруулсан явдал болсон байна.
Барууны ийм хэв маяг нь Ли Сольд тун аятайхан зохиж илүү их загварлаг болгосон байна гэж шинжээчид үзэж байгааг өмнөд Солонгосын хэвлэлүүд онцолжээ.
Зарим нь үүнийг удирдагч Ким Чен Унд өөрт нь богинохон халимаг үс таалагддагтай холбоотой гэж тайлбарлаж байна. Умард Солонгост удирдагчийн хувцас, үсний хэв загвар нь олон нийтийн дууриал болдог. “Моранбон” хамтлагийн жүжигчид дараагийнхаа концертод үсээ богинохон засуулчихсан байсан нь үүний нэг илрэл.