Хичээлийн шинэ жил эхэлж байгаатай холбогдуулан Нийслэлийн Засаг дарга Э.Бат-Үүл замын хөдөлгөөний ачааллыг бууруулах зорилгоор автомашины улсын дугаарын сүүлийн оронгийн тэгш, сондгойгоор нь ялгавартай замын хөдөлгөөнд оролцуулах шийдвэр гаргасан. Энэ нь ч үр дүнгээ өгч, хотын гудамж үнэхээр сэлүүхэн, санасан газраа саад хүрэхэд хялбар болж. Гэхдээ нэг гэм нь зам сэлүүхэн байна гэж хурдалж байгаад замын хяналтын камерт хурд хэтрүүлсэн гэж бичигдэх нэг муу талтай байгааг энд дурьдах нь зөв болов уу. За энэ ч яахав. Жолоочийн хувийн ухамсраас хамаарах зүйл.
Аливаа сайн зүйлийг саар зүйл дагаж байдаг даа. Тэгвэл жолооч нар замын хөдөлгөөнд оролцохын тулд, машиныхаа дугаарыг хязгаарлуулахгүй байх олон янзын арга сэдэх болж. МУГЖ, “Х-ТҮЦ” хамтлагийн жүжигчин Аглуу буюу Л.Баттулга хүртэл машиныхаа дугаарыг сольж байгаад нэгэн фэйсбүүкчний дуранд өртөж  пакталж байсан удаатай. Тэгвэл хотын гудамжаар автомашиныхаа улсын дугаарыг буруу харуулж зүүчихээд, “Дугаарын хязгаарлалтад орохгүй” гээд давхиж яваа нэгэн байхад мөн машиныхаа дугаарын сүүлийн хоёр оронд шавардчихсан жолооч ч явж л байна. Үүнийгээ сүүлийн үед Улаанбаатарт дэлгэрээд байгаа “дугаар шавардах АРТ” гэх. Мэдээж хэн нэгэн хошигнож л ингэж хэлсэн байх. Харин эрхэм жолооч бол цагдаад баригдчихгүй л бол хамаагүй гэсэн шиг давхиж яваа нь ойлгомжтой.

Энэ мэтчилэн Үүл баатарын гаргасан шийдвэрийг зарим жолооч эсэргүүцэж байх жишээтэй. Ямар сайндаа “ҮҮЛ машин зовооно” гэсэн хэлц гарсан байх вэ дээ.