Дэлхийн хоёрдугаар дайны үед хэдэн арван мянган еврей, цыган, бэлгийн цөөнхийг хорьж амийг нь хөнөөсөн аймшигт Дахаугийн бөөнөөр хорих лагерь байсан газарт Германы канцлер Ангела Меркель очсон байна. Түүнийг энэ хорих лагерийн хоригдол байсан 93 настай Макс Маннхаймер энэ дурсгалын цогцолборт ирэхийг урьжээ.
“Аль ч улс оронд, хэзээ ч ингэж хүний эрхийг зөрчиж, тэднийг шашин шүтлэг, улс төрийн үзэл бодол, бэлгийн чиг хандлагаар нь ялгаварлах явдал бүү давтагдаасай” гэж Германы Засгийн газрын тэргүүн хэлжээ.
Харин сөрөг хүчнийхэн болохоор сонгуулийн өмнөх кампанит ажлаараа энд энд эмгэнэл илэрхийлж яваа нь зохисгүй үйлдэл хэмээн шүүмжилж байна.
Германд нэг сарын дараа бүх нийтийн сонгууль болно.
Ингэснээрээ Ангела Меркель өнгөрсөн  зууны эхний хагаст германчуудын үйлдсэн гэмт хэргийн төлөөнөө энэ хорих лагерь байсан газарт хүрэлцэн очиж эмгэнэл илэрхийлсэн Германы Засгийн газрын анхны тэргүүн болж байна.