Америкийн Үндэсний аюулгүй байдлын агентлаг алан хядагч “Аль-Кайда” бүлэглэлийн өндөр албаны гишүүдийн утсыг чагнасныхаа үндсэн дээр тэд европын орнуудын хурдан галт тэргэнд халдан бөмбөг дэлбэлж магадгүй гэж үзжээ. Энэ талаарх баримт мэдээллээ Үндэсний аюулгүй байдлын агентлагийнхан европын түншүүддээ шилжүүлэн өгсөн хэмээн тусгай албаны эх сурвалжийг үндэслэн Bild мэдээллээ. Аюулгүй албаныхны үзэж байгаагаар алан хядагчид төмөр замын шугам, замын дагуух хонгил, хамгийн гол нь хурдан галт тэргэнд  халдаж магадгүй юм байна. Үүний үр дүнд немцийн тусгай алба өндөржүүлсэн бэлэн байдалд ажиллаж эхэлсэн байна. Немцийн  төмөр замынхан хоёр долоо хоногийн өмнөөс тодорхой нэмэлт арга хэмжээнүүд авч аюулгүй байдлыг сахиулж эхэлсэн байна. Энэ хүрээнд төмөр замын шугамуудад байнгын хяналт тавьж, төмөр замын буудлуудад цагдаагийнхан хяналт тавьж байна.