Монголын эдийн засагт үүсээд буй хямралыг гадаадын хөрөнгө оруулалт буурсантай холбон тайлбарлаж байгаа. Өдөр ирэх тусам “ноён” долларын ханш чангарч буй нь иргэдийн нуруун дээрх ачааг нэмсээр байна. Энэ бүхнийг хазаарлаж, улсын төсвийн тасалдлыг нөхөх арга саам эрэлхийлэх үүднээс УИХ-ын ээлжит бус чуулганыг ирэх сарын 2-6-нд хуралдуулахаар болжээ. Ээлжит бус чуулганаар Засгийн газраас өргөн барихаар бо­ловсруулсан Хөрөнгө оруу­лалтын тухай хуулийг хэлэлцэж батлахаар төлөвлөсөн байна. Түүнчлэн эдийн засгийн хүндрэлтэй байдлыг даван туулах зорилгоор  Засгийн газраас боловсруулсан УИХ-ын тогтоолын төслийг хэлэлцэх асуудал ч төлөвлөгөөнд тусаад буй аж. Хөрөнгө оруу­лалтын тухай хуулийн төслийг өнгөрсөн хаврын чуулганаар өргөн барьж хэлэлцүүлэхээр Засгийн газраас бэлтгэж бай­сан юм.
Уг хууль батлагдсанаар өнгөрсөн оны тавдугаар сард батлагдсан Стратегийн ач холбогдол бүхий салбарт үйл ажиллагаа явуулж бай­гаа аж ахуйн нэгжид гадаадын хөрөнгө оруулалтыг зохи­цуулах тухай болон Гадаадын хөрөнгө оруулалтын тухай хууль хүчингүй болох аж.
Ээлжит бус чуулганаар хэлэлцэхээр төлөвлөж буй шинэ хуулийн төсөлд Хөрөнгө оруулалтын болон Тогтвортой байдлын гэрээгээр олгогддог, хөрөнгө оруулах үед нь байсан татварын болон бусад эрх зүйн орчин  жижиг, том, гадаад, дотоод гэж ялгахгүйгээр бүгдэд тэгш үйлчилж, хөрөнгө оруулалтыг хамгаалахаар тусгаад буй гэнэ.