Шанхай хотод урьд хожид үзээгүй халуун шатсан зун болж байна. Тус хотод сүүлийн 24 хоног нэг ч өдөр алгасалгүй тогтмол 35 хэмээс дээш халж байгаа бөгөөд нэг өдөр бүр 40 хэм давсан удаатай. Ингэж хэт халсны улмаас 10 хүн нас барсан мэдээ байна. Ер нь, Шанхай гэлтгүй Хятадын Аньхуй, Жиансу, Хунан, Хубей зэрэг мужид онц байдал зарлахуйц хэмжээнд хүрч халж  байгаа аж. Гадаа хэр халуун байгааг Шанхайн нэг телевиз үзүүлэхдээ гантиг шалан дээр гахайн мах тавихад 10 минутын дотор шарагдаж борлосон байна. Ийм өндөр хэмээр халуун шатаж байгаа учир эрх баригчдын зүгээс олон нийтийг аль болох гадагш гарахгүй байхыг сануулж байна.