МАН-ын Удирдах зөвлөл, Тусгаар тогтнолынхоо ордонд хуралдаж байгаа юм байна. Энэ хурлаар МАН-ын Бага хурлаа хэзээ хуралдуулах тов тогтоох, Бага хурлаар хэлэлцэх асуудлын төсөл боловсруулах юм байна. Урьдчилсан таамгаар МАН-ын Бага хурлыг ирэх наймдугаар сарын 5-нд хуралдуулахаар төлөвлөж байгаа бололтой.
МАН-ын “Шинэчилье” хөдөлгөөнийхөн Бага хурлаа зарлан хуралдуулахыг Удирдах Зөвлөлөөсөө удаа дараа шаардаж, өнөөдөр 30-нд хуралдуулахаар гарын үсэг цуглуулж байсан ч энэ бүтээгүй болохоор өнөөдөр энэ асуудлаар бас хуралдаж байгаа мэдээлэл байна. Тэд Бага хурлаар хэлэлцэх асуудалд өөрсдийн саналаа оруулах тухай ярьж байгаа гэлээ.
Ихэвчлэн НАМЗХ-гийн гишүүд, удирдлагуудаас бүрдсэн “Шинэчилье” хорооныхон МАН-ын бага хурлыг яаралтай хуралдуулан Их хурлын тов тогтоож таван ч удаагийн сонгуульд намаа амжилтгүй оролцуулж ялагдуулсан намын дарга, Удирдах зөвлөлийн гишүүдэд  хариуцлага тооцон огцруулах, намны бодлого үйл ажиллагааг эрс өөрчлөх шаардлага тавьж, УИХ-ын зарим гишүүдийг талдаа элсүүлээд байгаа юм.
Харин МАН-ын удирдлагыг аваад нэг жил л болж байгаа Ө.Энхтүвшин тэргүүтэй өнөөгийн удирдлагууд нь ааг зааг хийн тэдний шаардлагыг хүлээж авалгүй цаг хожсоор байгаа юм.