Их Британийн хатан хаан II Элизавета хаан ширээнээ залраад 60 жилийн нүүр үзжээ. Тэрээр 1953 оны зургадугаар сарын 2-нд эцгээсээ хаан ширээг нь өвлөн авч, дэлхийг донсолгосон ёслол хийж байв.  Нэгэн жарны өмнө болсон тэрхүү өндөр хүндэтгэлийн ёслолоос өдгөө түүхийн гэрч болон үлдсэн хувцас хэрэглэлийг олон нийтэд үзмэр болгон дэлгэн тавьжээ. Кино, түүхэн зургаас л хардаг хатан хаан II Элизаветагийн хаан ширээнд залрахдаа өмссөн тансаг даашинз, нөмрөг, үнэт титэм, түүний хэрэглэсэн үзэг, дэвтэр, хүлээн авалтын ширээ, таваг сэлтийг үзэсгэлэнд дэлгэсэн байна.