АНУ-ын домогт Ерөнхийлөгч Жон Кеннедигийн гэр бүлээс өдгөө цор ганцаар үлдэж хоцорсон, охин Каролин Кеннедиг Японд суух Элчин сайдаар томилохоор Ерөнхийлөгч Барак Обама нэр дэвшүүлжээ.
Олон нийтийн ажилд идэвхтэй оролцдог ч улс төрд төдийлэн гар бие оролцохгүй байсаар өдий хүрсэн Каролин Кеннеди Барак Обамагийн үнэнч дэмжигчдийн нэг. Тэрээр Б.Обамаг Ерөнхийлөгчийн сонгуульд намаасаа нэр дэвшүүлэхийг дэмжиж байгаагаа мэдэгдэж, кампанит ажилд нь тус болж байсан юм. 2012 оны Ерөнхийлөгчийн сонгуулийн үеэр ч түүний штабт ажиллаж байсан. Харин тэр тусынх нь хариу өнөөдөр ийнхүү ирж байгаа бололтой. Уламжлал ёсоор АНУ-ын Ерөнхийлөгч нар сонгуулийнх нь кампанит ажилд гар бие тусласан, өндөр хандив өргөсөн хүмүүст Элчин сайдын суудал өгдөг. Тэр дагуу хатагтай Кеннедид Японы Токио хотод суух Онц бөгөөд бүрэн эрхэт Элчин сайдын суудлыг өгөхөөр шийдсэн бололтой. Каролин Кеннеди 2009 онд Нью-Йорк мужаас Сенатын суудалд өрсөлдөхөөр бэлтгэж байсан ч хувийн шалтгааны улмаас сүүлд нь нэрээ татсан юм.
Тэрээр Ерөнхийлөгч Жон Кеннеди, тэргүүн хатагтай агсан Жаклин Кеннеди нарын том хүүхэд юм.