Бүтэн жилийнхээ алжаал ядаргааг тайлах гэсэн хүмүүс зуны дэлгэр цагаар амарч, зугаалах нь ихэсдэг. Төрийн байгууллагууд ч “амралт”-ын байдалд шилжиж, сургууль, цэцэрлэг эхэлтэл нэг хэсэгтээ л үйл ажиллагаа нь жигдэрдэггүй. Наадмын дараагаас төрийн гурван өндөрлөгүүд 7-10 хоног амарч байгаа. Үүнтэй зэрэгцэн шинэчлэлийн Засгийн газрын сайд нар ээлжийн амралтаа аваад байна. Ерөнхий сайд Н.Алтанхуяг өнгөрсөн долоо хоногт Хэнтий, Дорнод чиглэлийн автозамын үйл явцтай танилцангаа Ерөнхийлөгчийн хамт Буйр нуурт очиж амарсан. Харин тэрээр өчигдрөөс эхлэн баруун чиглэлийн замын ажлын явцтай танилцангаа амралтаа үргэлжлүүлэх юм байна. Өөрөөр хэлбэл, Тосонцэнгэл, Улиастай чиглэлийн замын ажлын явцтай танилцахын зэрэгцээ Завханы Эрдэнэхайрхан сумын Хар нууранд очиж хонох юм байна. Үүнээсээ цаашлаад Увс чиглэлийн замаар явж, Увс нууранд очихоор төлөвлөсөн аж.
Ерөнхийлөгч энэ сарын дундуур амралтаа авч Монголынхоо сайхан орноор аялж, амарч байгаа бол УИХ-ын дарга З.Энхболд энэ сарын 18-наас Архангай, Өвөрхангайг зорьжээ. Тэрээр энэ долоо хоногт нийслэлд ирж, ажилдаа орох юм байна.