АНУ-ын Тагнуулын байгууллагын нууцыг задруулж орхисноос болоод эх орондоо буцах аргагүй болоод байгаа Эдвард Сноуденд хоёр ч орон улс төрийн орогнол олгохоор санал тавиад байна. Латин Америкийн Никарагуа болон Венесуэлийн удирдагчид түүнд улс төрийн орогнол олгож болох юм хэмээн мэдэгджээ.
Москвагийн онгоцны буудлын дамжин өнгөрүүлэх хэсэгт нуугдаж буй гэх Эдвард Сноуден 21 оронд улс төрийн орогнол хүссэн өргөдөл гаргасан ч дийлэнх нь түүний саналыг хүлээх авахаас татгалзсан тухай түүнд туслаж буй “Wikileaks” мэдэгдсэн. Ер нь, Эдвард Сноуденд улс төрийн орогнол олгох нь тийм ч амар шийдэх асуудал биш болох өнгөрсөн долоо хоногт болсон явдлаас харагдсан. Боливийн Ерөнхийлөгч Эво Моралесын сууж явсан онгоцонд Эдвард Сноуден сууж явсан байж болзошгүй гэсэн шалтгаанаар Франц, Испани зэрэг Европын орнууд өөрийн агаарын  бүсээр онгоцыг нэвтрүүлэхээс татгалзсан нь томоохон шуугиан тарьсан билээ. Энэ явдал Латин Америкийн удирдагчдын эгдүүцлийг ихээхэн төрүүлж,  олон улсын дипломат харилцаанд ч сэв суулгаж мэдэхээр байгаа юм.