УИХ-ын өнөөдрийн хуралдаанаар Цахиагийн Элбэгдоржийг  Монгол Улсын Ерөнхийлөгчөөр сонгогдсон гэж үзэж бүрэн эрхийг нь хүлээн зөвшөөрөх тухай хуулийн төслийг хэлэлцэн  санал хурааж, 54 гишүүнээс 51 гишүүн зөвшөөрснөөр 94,4 хувийн саналаар Монгол Улсын Ерөнхийлөгчийн бүрэн эрхийг хүлээн зөвшөөрлөө.
Мөн Монгол Улсын Ерөнхийлөгчид тангараг өргөх тухай 1993 оны журамд өөрчлөлт оруулж, Их Эзэн Чингис хааны хөшөөний өмнө буюу Сүхбаатарын талбайд ард түмнийхээ өмнө тангараг өргөхөөр болгож өөрчиллөө.
Ингэснээр Монгол Улсын Ерөнхийлөгч  Эзэн Чингис хааны хөшөөний өмнө тусгайлан зассан талбайд тангаргаа өргөж энэ үеэр цэргийн ёслолын жагсаал болох  юм.  
Мөн энэ үеэр УИХ-ын гишүүд, Засгийн газрын гишүүд, УИХ-ын дарга нар тусгай урилгаар  хүндэтгэлийн арга хэмжээнд оролцоно.  Ийнхүү Монгол улсын Ерөнхийлөгчийн зургаа дахь удаагийн сонгуульд ялсан одоогийн Ерөнхийлөгч Ц.Элбэгдорж үндэсний их баяр наадмын өмнөх өдөр Сүхбаатарын талбайд морин цагт буюу 11.40 цагт ард түмнийхээ өмнө тангараг өргөх боллоо.