Египетийн Ерөнхийлөгч Мухаммед Мурси төрийн тэргүүнээр хууль ёсоор сонгогдсон тул албан тушаалаа өгөхгүй гэдгээ зарлалаа. Тэр бас армийнхныг өргөсөн тангарагтаа үнэнч байж, албан үүргээ хэрэгжүүлэхийг уриалсан байна. Тэр ард түмэндээ хандаж телевизээр үг хэлэхдээ “Миний албан үүргээ хэрэгжүүлж байгааг баталгаажуулсан хууль байгаа” гээд өнгөрсөн үеийн авлига гэмт хэргийн үр дагаврыг арилгахад өөрт нь цаг хугацаа өгөхийг ард түмнээсээ хүсчээ. Өөрийгөө улс орныхоо түүхэнд анх удаа жинхэнэ ардчилсан зарчмаар сонгогдсон Ерөнхийлөгч гэдгийг бас тодотгосон байна.
Ерөнхийлөгч Мухаммед Мурсиг огцрохыг шаардан орон дааяр болж байгаа эсэргүүцлийн хөдөлгөөнийхөн түүнийг огцрох тухайгаа 48 цагийн дотор зарла хэмээн тулган шаардаад байсан юм. Түүнийг огцруулах нь зүйтэй гэсэн санал асуулгад тус улсын 22 сая хүн гарын үсэг зурсан юм.