Хятад ба Япон хоорондын газар нутгийн маргааны төв болоод байгаа Сенкаку арлын талаар хэлэлцээр хийх нөхцлийг манай урд хөршийн эрх баригчид Наран улсад тулгажээ.
Эдгээр нөхцлийн дагуу Япон нь газар нутгийн маргаан байгаа гэдгийг албан ёсоор хүлээн зөвшөөрч, цаашдаа энэ асуудлын талаар авч хэлэлцэх ёстой байв. Гэтэл Япон нь хэний ч мэдэлд байгаагүй арлыг 1895 оноос хойш эзэмшиж байгаа гэж мэдэгдсэн болохоор үүнийг хүлээн зөвшөөрөх ямар ч боломжгүй юм. Харин Хятадын тал нь маргаантай арлуудыг бүр 600 жилийн тэртээгээс эзэмшиж байгаа, Японы зохиосон 1783 оны газрын зурагт арлуудыг тухайн үеийн Манж Чин улсын мэдлийнх гэж тэмдэглэсэн байсан гэж маргалдаж байгаа юм.
Дэлхийн хоёрдугаар дайн дууссаны дараагаар арлуудыг Америк мэдэлдээ байлгаж байгаад 1972 онд Японы талд хүлээлгэн өгсөн байдаг.
Хүн амьдрах боломжгүй жижиг бүлэг арлуудын орчмоос ихээхэн хэмжээний газрын тос, шатдаг хийн орд газар илэрсэн нь газар нутгийн маргааныг улам ээдрээтэй болгож байгаа билээ.